Pou onore manman yo, Juno7 ofri « Melani » sou YouTube

👤 Kreyòl Enfo

Kreyòl Enfo, 30 me 2020.- Nan lokazyon fèt manman yo demen dimanch 31 me a, medya nimerik Juno7 ap ofri entènot yo feyton ayisyen « Melani » gratis sou YouTube. Nédgi Baptiste, Rose-Guerline Ganthier, Ricardo Nelson, Erick Laguerre ak Lainé Samantha se kèk pami aktè ki patisipe nan feyton sa.

Nan Melani, Sineyas Camille Moise alyas Kharmeliaud ak pwodiktè John Fritz Moreau rakonte istwa « Kèkèt ak Melani ( manman ak pitit) k ap bat dlo pou fè bè men ki gen yon rèv : pèmèt Melani rantre nan kapital la pou al etidye nan inivèsite. Magre anpil peripesi, Kèkèt ak Melani rete doubout ».

Melani ap disponib sou chanèl YouTube Juno7 la ( dimanch 4trè) nan lide pou bay plis moun posibilite swiv feyton sa ki te fè anpil siksè pandan premye soti li 14 fevriye pase a nan palè minisipal Dèlma a, daprè John Fritz Moreau ki swete sinema ayisyen reprann plas li nan sosyete a.

Anpil obsèvatè kwè Melani ka louvri pòt pou pèmèt lakilti jwenn bourad lòt sektè sitou nan moman kote medya yo ap fè pwomosyon pou pwodiksyon etranje ki pa marande ak reyalite sosyal ak kiltirèl peyi a.

Kreyòl Enfo

ou ka enterese