Pou lapolis, se 3 moun sèlman ki mouri Lasalin pandan senmenn nan

Otorite nan Lapolis yo reyaji pou premye fwa, ayè vandredi a 16, depi aprè divès sitwayen, palmantè ak òganizasyon nan sosyete sivil la te fin denonse  » yon mansak » bandi ak zam ta fè sou abitan Lasalin madi 14 novanm pase a.

Malgre foto pase 10 kadav sou pil fatra k ap fè laviwonn rezo sosyal yo, pòt vwa Lapolis la, Michel-Ange Louis-jeune, di se 3 kadav sèlman otorite yo konte anba lavil la soti 9 pou rive vandredi 16 novanm nan.

Toutfwa, pòt vwa lapolis la anonse yon ankèt deja louvri sou foto ak videyo ki gaye sou rezo sosyal yo ki fè kwè ta gen plis pase 10 moun ki pèdi lavi yo Lasalin madi pase a.

Depite premye sikonskripsyon Pòtoprens la, Roger Millien ki di li konfime gen yon dividal moun ki tonbe madi 13 novanm pase a lonje dwèt li sou plizyè gwo zotobre nan pouvwa Tèt Kale a kòm moun ki ta maniganse « masak » sa.