Récents :

Kreyòl Enfo

Se sous la

Ensekirite Manifèstasyon 

Pòtoprens, zagoloray touye epi boule yon ajan CIMO

Kreyòl Enfo , ,

Ayiti, 19 novanm 2018.- Durosier Jurond, 22èm pwomosyon nan Lapolis, tonbe anba bandi jodi lendi a (19) nan katye Lasalin, Pòtoprens.

Daprè enfòmasyon ki rive jwenn Kreyòl Enfo (KE), viktim nan te sou yon taksi moto pandan li t ap tante rantre nan baz Kò entèvansyon pou mete lòd ( CIMO, sig nan lang franse), Dèlma 2.

Bandi yo ki te kanpe chofè moto a, idantifye epi mete men sou polisye a. Zagoloray yo rantre ak Durosier Jurond Lasalin epi tenyen souf li. Enfòmasyon Lapolis pa konfime fè kwè atoufè yo ta mete dife sou ajan CIMO a tou vivan.

Pandan yon operasyon plizyè inite nan Lapolis la mennen aprè midi a, fòs lòd yo rive pran rès kadav boule a nan katye Lasalin.

Nan kòmansman lanwit la, sitiyasyon an toujou rete malouk nan kapital la kote katouch ap tire nan bout kwen.

Yon rapò Fondasyon je klere ( FJKL) soti vandredi 16 novanm pase fè kwè gen soti 15 rive 25 moun ki pèdi lavi yo nan lanwit madi 13 novanm lan nan katye Lasalin. Toujou daprè rapò sa, bandi yo fè kadejak sou 6 fanm epi mete dife nan plizyè kay.