Kreyòl Enfo, 3 septanm 2020.- Avoka nan bawo Pòtoprens akonpaye ak plizyè santèn etidyan mache nan divès ri kapital la, jodi jedi a(3), nan lide pou reklame jistis pou Mèt Monferrier Dorval. Pwotèstatè yo ki t ap lanse anpil move pawòl kont otorite nan Leta a denonse asasina batonye lòd avoka Pòtoprens yo 28 dawout pase a nan zòn Peleren 5, nan katye kote prezidan Jovenel Moise abite.
Pwotèstatè yo egzije demisyon prezidan Jovenel Moise yo di ki pa gen kapasite pou dirije peyi a. Yo pwofite denonse ensekirite ki tabli sou tout peyi a sitou zòn metwopolitèn Pòtoprens la.
Avoka yo anonse mobilizasyon sa pap kanpe toutotan yo pa jwenn jistis pou Mèt Dorval. Yo prevwa bloke fonksyònman tout aparèy jistis la nan peyi a.
Avoka nan bawo divès peyi nan mond la denonse zak asasinay sa epi egzije jistis pou Monferrier Dorval ki te pwofesè tou nan divès inivèsite nan peyi a.
Kreyòl Enfo