Home Aktyalite Pòtoprens ak divès vil pwovens mobilize pou chavire Jovenel Moïse

Pòtoprens ak divès vil pwovens mobilize pou chavire Jovenel Moïse

by Kreyòl Enfo

Kreyòl Enfo, 11 jen 2019 .- Pou yon dezyèm jounen yonn aprè lòt, sitwayen nan kapital la ak divès vil pwovens te pran lari, jodi madi a (11 jen), pou kontinye mande Jovenel Moïse kite pouvwa a.

Nan vil Gonayiv, plizyè milye sitwayen ki soti sitou nan katye popilè yo pran lari nan yon anbysns kanaval epi lanse anpil pawòl piman bouk kont Chèf Leta a. Yonn nan lidè opozisyon an nan site lendepandans la, Raphael Marado Clavanet, bay garanti mobilizasyon pou ranvèse pouvwa Tèt Kale a pap kanpe nan wout.

Sitiyasyon an pat depaman nan vil Jakmèl kote popilasyon an te pran lari epi mache fèmen divès enstitisyon piblik tankou prive ki t ap fonksyone nan kòmansman jounen an.

Vil Okay te chofe tou pandan tout jounen madi a. Manifestan k ap mande demisyon prezidan Jovenel Moïse sou pouvwa a te twoke kòn yo ak Lapolis. Pou pi piti 3 moun soti blese pandan eskonbrit sa.

Gwo van tansyon te soufle tou sou kapital la ak komin ki nan lantouray li yo. Lekòl, komès, transpò piblik…tout aktivite te rete bloke pou dezyèm jounen operasyon peyi lòk la.

Prezidan Repiblik la, Jovenel Moïse, poko janm di yon mo sou sitiyasyon latwoublay k ap frape peyi a depi dimanch 9 jen pase a.

Kreyòl Enfo

0 comment