Kreyòl Enfo, 18 oktòb 2020.- Nan lokazyon komerasyon lanmò Anperè Jan Jan Desalin ayè samdi 17 oktòb la, plizyè milye moun te pran lari pou denonse fenomèn ensekirite a epi egzije demisyon Jovenel Moise nan tèt Leta a. Plizyè lidè politik pami yo André Michel ak ansyen senatè Antonio Cheramy alyas Don K-To te prezan nan manifestasyon sa kote pwotestatè yo t ap lanse anpil pawòl piman bouk kont ekip Tèt Kale a.
Kolaboratè Kreyòl Enfo (KE) ki te prezan nan manifestasyon sa konstate pou pi piti 2 moun blese anba bal nan zòn Dèlma 95. Plizyè militan akize yon gwoup endividi yo di ki pwòch pouvwa a ki ta tire sou manifestan yo.
Manifestan yo pat reyisi fè tout pakou yo te anonse a akoz fòs lòd ta pral itilize anpil gaz lakrimojèn pou kraze manifestasyon an depi nan zòn Dèlma 60. Youn nan pòt vwa polis nasyonal Ayiti a (PNH, sig nan lang franse) di ajan fòs lòd yo te « oblije » kraze manifestasyon an pou te anpeche gen derapaj.
Te gen gwo mouvman pwotestasyon tou nan plizyè lòt vil peyi a toujou pou fòse prezidan Jovenel Moise demisyone.
Nan vil Okap, ansyen senatè Jean Charles Moise te nan tèt plizyè milye moun ki t ap egzije demisyon pouvwa Tèt Kale a. Lidè Pitit Desalin te depoze yon bouke flè nan abitasyon Kòmye, lokalite kote lonbrit Anperè a te antere daprè plizyè istoryen.
Kreyòl Enfo