Politik :Tout dispozisyon deja pran pou seyans mizannakizasyon chèf Leta a

Kreyòl Enfo, 7 dawout 2019.- Tout je fikse sou chanm depite a ki ta dwe òganize, jodi mèkredi 7 dawout la, seyans mizannakizasyon prezidan Repiblik la, Jovenel Moïse. Depite yo ki nan opozisyon an akize chèf Leta a kòm otorite ki komèt krim wot trayizon (haute trahison, nan lang franse).

Plizyè òganizasyon ak militan politik nan divès depatman nan peyi a ap fè presyon sou palmantè yo pou mande yo vote kont chèf Leta a.

Pòtoprens, òganizasyon Palman popilè òganize, ayè madi 6 dawout la, yon seyans senbolik sou Chanmas la. Pandan aktivite sa, militan yo lanse anpil move pawòl kont depite ki nan gwoup majorite a.

Nan vil Gonayiv, plizyè òganizasyon ki pale ak laprès voye yon pinga bay palmantè Latibonit yo. Raphaël Clavanet Marado, Marckendy Pierre Louis ak Fritz Désir ki te pran lapawòl nan non divès òganizasyon mande depite yo voye prezidan Jovenel Moïse jije pou dwèt li ki tranpe byen fon nan kòripsyon, krim ak dosye PetwoKaribe a.

Vis prezidan pou zafè seyans nan chanm depite a di tout dispozisyon deja pran pou « seyans istorik » sa kòmanse aprè midi a.

Kolaboratè Kreyòl Enfo ki akredite nan palman konstate lapolis deja pran gwo dispozisyon pou garanti sekirite nan tout lantouray enstitisyon an.

Kreyòl Enfo