Polisye Guerby Geffrard, delege SPNH-17, tonbe anba bal bandi 2 mwa aprè li te fin denonse yon konplo pou asasinen l

👤 Kreyòl Enfo

Polisye Guerby Geffrard, delege SPNH-17, tonbe anba bal asasen

Kreyòl Enfo, 2 me 2021.- Endividi otorite yo poko rive idantifye touye Guerby Geffrard, delege SPNH-17 la, aswè samdi premye me 2021 an. Guerby Geffrard te gradye nan 28e pwomosyon Polis Nasyonal Ayiti a (PNH, sig nan lang franse).

Rèsponsab enstitisyon polisyè a te mete yon manda ak tout yon avi pou chèche Guerby Geffrard sou pretèks yo sispèk li ta manm gwoup Fantom 509. Yon akizasyon ajan an toujou voye jete.

Pandan yon rankont ak laprès nan mwa fevriye pase a, sendikalis la te denonse yon konplo li di ki t ap fèt pou asasinen l. Guerby Geffrard te lonje dwèt sou Direktè jeneral PNH la, Léon Charles, ansanm ak manm komisyon prezidansyèl CNDDR yo kòm otorite ki ta dèyè do konplo sa.

»   Ensekirite : 3 jèn gason mouri anba bal bandi nan komin Kafou

Plizyè manm ak ansyen manm Sendika Polis Nasyonal Ayiti a (SPNH-17) gen manda ak avi pou chèche yo. Gen plizyè nan yo ki fèmen nan prizon depi yon bon bout tan malgre yo poko pase devan jij natirèl yo.

Sendikalis ak defansè dwa moun ki nan peyi a pa sispann denonse pèsekisyon yo di rèsponsab PNH la ap fè kont manm Sendika Polis Nasyonal Ayiti a k ap egzije pi bon kondisyon pou polisye yo fè travay yo.

Kreyòl Enfo

ou ka enterese