Home Aktyalite Plizyè moun mouri pandan manifestasyon kont Jovenel Moise dimanch 27 oktòb la

Plizyè moun mouri pandan manifestasyon kont Jovenel Moise dimanch 27 oktòb la

by Kreyòl Enfo

Kreyòl Enfo, 27 oktòb 2019 .- Pòtoprens ak lòt komin ki antoure l yo viv yon lòt jounen tansyon, dimanch 27 oktòb la, pandan manifestasyon kont Jovenel Moise ak pouvwa Tèt Kale a. Pou pi piti 3 moun pèdi lavi yo, plizyè biznis sakaje.

Daprè enfòmasyon ki rive jwenn redaksyon Kreyòl Enfo (KE), yon gwoup endividi louvri katouch sou manifestan yo nan komin Petyonvil. Yon manifestan ki te resevwa yon bal nan tèt mouri lapoula.

Popilasyon an ki te move kou kong, touye ak kout wòch epi mete dife sou kadav yon jèn gason yo akize kòm  » pwòch pouvwa a » ki ta tire manifestan an.

Yon twazyèm sitwayen pèdi lavi l tou pandan jounen an nan zòn Nazon. Viktim nan ki rele Jean Baptiste Beril resevwa 6 katouch pandan li te sou yon motosiklèt. Jèn gason sa ki gen 36 lane te soti Site Solèy pou al manifeste kont pouvwa Tèt Kale a. Jean Baptiste Beril mouri kite kat (4) pitit.

Manifestan yo sakaje plizyè depo ak magazan nan komin Dèlma ak Petyonvil. Yo t ap tante mete dife tou nan lokal yon bank komèsyal Petyonvil.

Kreyòl Enfo

0 comment