Home Aktyalite Plizyè gwo chabrak nan Leta a refize kolabore ak Lakou dèkont nan dosye PetwoKaribe a

Plizyè gwo chabrak nan Leta a refize kolabore ak Lakou dèkont nan dosye PetwoKaribe a

by Kreyòl Enfo

Pòtoprens, 20 desanm 2018. – Nan yon lèt li ekri premye minis Jean Henry Céant 4 desanm pase a, prezidan Lakou dèkont la, Pierre Volmar Demesyeux, lonje dwèt sou rèsponsab Ministè agrikilti resous natirèl ak devlopman riral, Ministè ekonomi ak finans ansanm ak Enstiti nasyonal fòmasyon pwofesyonèl (INFP, sig nan lang franse) kòm otorire ki refize bay Lakou dèkont enfòmasyon sou lajan yo t ap jere nan pwogram PetwoKaribe a.

‘’M ap (Pierre Volmar Demesyeux) di w gen kèk responsab enstitisyon nan Leta a ki refize bay eksplikasyon sou ansanm pwojè yo t ap egzekite oubyen yo t ap finanse egzekisyon yo », daprè sa moun kapab li nan lèt la. Pierre Volmar Demesyeux presize pwojè sa yo te reyalize soti lane 2008 rive 2016.

Prezidan lakou dèkont la avèti premye minis Jean Henry Céant konpòtman rèsponsab enstitisyon sa yo kapab anpeche Lakou dèkont mennen ankèt pou fè limyè sou lajan ki te depanse pandan pwogram sa.

Konseye Lakou dèkont yo pwomèt y ap pibliye rapò ankèt y ap mennen sou gagòt ki te fèt nan lajan PetwoKaribe a nan mwa janvye 2019.

Kreyòl Enfo

0 comment