Play offs : Clippers yo kraze yon defisi 31 pwen epi egalize nan seri a ak Golden State

Kreyòl Enfo, 16 avril 2019 .- Sware istorik pou Los Angeles Clippers ki kraze yon defisi 31 pwen pou bat chanpyon NBA yo, Golden State Warriors (135-131), yèswa nan Oracle Aréna a. Se premye fwa yon ekip yo t ap mennen sou li pou tout pwen sa (31) genyen yon match baskètbòl nan listwa play offs.

Lou Williams 36 pwen, 11 pas, Montrezl Harrell 25 pwen, 10 rebon epi Danilo Gallinari 24 pwen, 6 pas se te prensipal ewo Clippers yo nan match sa (seri 1-1).

Lòt move nouvèl pou Warriors yo pandan sware a se blesi Demarcus Cousins nan kwadwisep. Yon blesi ki kapab lakòz Cousins pèdi rès sezon an.

Konferans lès

Nan Wells Fargo Center , Philadelphie Sixers bat Brooklyn nets 145-123 gras ak Ben Simmons ki fè yon « Triple-double » 18 pwen, 10 rebon ak 12 pas. Joël Embiid make 23 pwen ak 10 rebon pandan 20 minit (seri 1-1).

Mackenson Georges Forestal