PHTK ak divès òganizasyon politik nan opozisyon an chwazi Joseph Lambert kòm prezidan pwovizwa Ayiti

👤 Kreyòl Enfo

Joseph Lambert

Kreyòl Enfo, 10 jiyè 2021.- Aprè asasina Jovenel Moïse douvanjou 7 jiyè 2021 an, plizyè pati politik pwòch pouvwa a ak nan opozisyon antann yo pou chwazi prezidan ti rès Sena Repiblik la, Joseph Lambert, kòm prezidan pwovizwa Ayiti.

Regwoupman ak pati politik tankou Pati Ayisyen Tèt Kale (PHTK), Verite, INITE, Lòd Demokratik, DIRPOD ansanm ak plizyè pèsonalite nan sosyete sivil la siyen akò sa pou mete senatè Sidès la sou pouvwa a. Estrikti politik sa yo rekonèt Doktè Ariel Henry te deja nonmen pou okipe pòs Premye minis nan yon arete prezidansyèl Jovenel Moise te siyen 5 jiyè 202 1 pase a. Nan sans sa, Ariel Henry ta dwe rete kòm Premye minis.

»   Asasina Prezidan Jovenel Moise : Repiblik Dominikèn fèmen fwontyè li ak Ayiti

Doktè Ariel Henry dwe mete sou pye yon gouvènman antant nasyonal nan tèt kole ak fòs politik yo epi aktè nan sosyete sivil la ki siyen akò sa. Ansanm responsab pati politik sa yo antann yo tou pou mete sou pye yon lòt konsèy elektoral pwovizwa selon atik 289 konstitisyon an ki pral òganize eleksyon lè sitiyasyon pèmèt sa.

Pitit Desalin ak Sektè Demokratik Popilè a se 2 pami òganizasyon politik ki pa siyen akò pou chwazi Joseph Lambert ak Ariel Henry dirije peyi a.

Kreyòl Enfo

ou ka enterese