Petyonvil : Lapolis arete yon jèn gason ak 3 zam, 200 katouch ak yon pakèt lajan

Kreyòl Enfo, 26 mas 2019 .- Polisye nan komisarya Dèlma 62 fouke prezime bandi Samuel Jeanty sou yon motosiklèt, douvanjou madi a (26), nan zòn Dèlma 101, komin Petyonvil. Jèn gason sa te gen nan men l twa (3) zam, 200 katouch ak yon magogo lajan.

Komisè prensipal Petyonvil la, Gospel Monélus presize Samuel Jeanty te akonpaye ak yon lòt endividi ki gentan chape poul li nan moman arèstasyon an.

Prezime bandi a toujou anba kontwòl ajan fòs lòd yo nan komisarya Petyonvil avan l ap reponn kesyon lajistis. Samuel Jeanty poko bay okenn enfòmasyon sou ki kote li jwenn ni ki sa li ta pral regle ansanm ak zam ak lajan sa yo.

Kreyòl Enfo