Home Aktyalite Penitansye nasyonal konfime 11 prizonye kontamine ak kowonaviris

Penitansye nasyonal konfime 11 prizonye kontamine ak kowonaviris

by Kreyòl Enfo

Kreyòl Enfo, 22 me 2020 .- Direktè administrasyon penitansye nasyonal la, Enspektè Charles Nazaire Noël, konfime pou redaksyon Kreyòl Enfo (KE) gen 11 prizonye sou 12 ki te fè tès kovid-19 la ki kontamine. Li presize Ministè Sante Piblik ak Popilasyon te fè prelèvman pou prizonye yo depi 12 me pase a.

Yon prizonye nan selil penitansye nasyonal (foto entènèt)

Enspektè Charles Nazaire Noël presize 11 prizonye kontamine yo nan izòlman nan espas ki te konn sèvi pou sant trètman kolera nan penitansye nasyonal la. Direktè a di yo chwazi espas la ak otorizasyon ministè lasante ki te egzije yo repare l avan li dezenfekte.

Kòmandan Charles Nazaire Noël anonse yon ansanm mezi li deja pran pou anpeche epidemi a gaye anndan prizon an. Enspektè jeneral la di li mande MSPP pou tèste tout prizonye nan peyi a ansanm ak tout lòt moun ki frekante espas prizon yo tankou polisye ak pèsonèl administratif.

Depi ayè jedi a, pwofesyonèl lasante tanmen yon operasyon depistaj pou prizonye nan penitansye nasyonal avan yo pase nan prizon Kwadèboukè ak rès peyi a. MSPP pwofite remèt administrasyon penitansye nasyonal yon pil materyèl ak ekipman pwoteksyon, daprè enspektè Charles Nazaire Noël.

Direktè administrasyon penitansye nasyonal la mande fanmi tout prizonye rete tèt frèt paske gen dispozisyon ki pran pou pwoteje tout moun ki fèmen nan prizon kont pandemi kovid-19 la.

Kreyòl Enfo

0 comment