Kreyòl Enfo, 29 jen 2020.- Youn nan rèsponsab konpayi transpò Haiti-Trans, Fritz Gérald Désir, anonse tout 16 pasaje ki te nan bis konpayi a bandi te pran nan zòn Mòn Kabrit (Lwès) yèswa dimanch la jwenn liberasyon yo. Fritz Gérald Désir konfime enfòmasyon sa nan yon videyo li pibliye sou rezo sosyal yo nan mitan jounen lendi 29 jen an.
Rèsponsab Haiti-Trans la presize, nan videyo sa, tout pasaje yo libere san yo pa grafonyen. Toutfwa, gen enfòmasyon ki fè kwè bandi yo pran telefòn, malèt ak lòt bagay enpòtan ki te nan men pasaje yo. Fritz Gérard Désir pa di si konpayi Haiti-Trans deja rekipe bis la.
Zak ensekirite yo pa sispann ogmante nan tout peyi a dènye jou sa yo. Pasaje ak chofè k ap fè ale vini sou wout nasyonal yo bouke rele nan zòrèy otorite yo pou polisye ki pa prezan sou wout yo kote atoufè pa sispann vòlè epi fè kadejak sou yo.
Kreyòl Enfo