Kreyòl Enfo 19 me 2020 .- Kòdonatris jeneral sendika lapolis nasyonal la (SPNH-17) pa gen dwa kite peyi a sou kèlkeswa fòm nan. Pakè Pòtoprens deja voye yon dokiman bay direktè Imigrasyon ak Emigrasyon an, Joseph Cianciully, sou desizyon sa.
Daprè enfòmasyon ki rive jwenn redaksyon Kreyòl Enfo (KE), Yanick Joseph gen eksplikasyon pou l bay otorite lajistis sou divès deklarasyon li fè sitou aprè arèstasyon polisye Jean Pascal Alexandre semèn pase a.
Nan yon mesaj vokal ki t ap fè laviwonn rezo sosyal yo, nimewo 1 SPNH-17 la te menase pou rantre nan penitansye nasyonal al libere polisye Jean Pascal Alexandre ki ta yon manm gwoup «Fantom 509».
Sèvis Imigrasyon ak emigrasyon dwe pran tout dispozisyon pou anpeche sendikalis Yanick Joseph kite peyi a ni anlè, nan lanmè oubyen atè, daprè dokiman sa ki pote siyati sibtiti komisè gouvènman, Mèt Guimail Nicolas.
Dimanch 17 me pase a, komite egzekitif SPNH-17 la te prezante ofisyèlman devan laprès san prezans kòdonatris la.
Kreyòl Enfo