Opozisyon an anonse 2 jounen grèv ak yon manifestasyon pou senmenn nan

Pòtoprens, dimanch 25 novanm 2018 .- Sektè demokratik popilè a pa deside kanpe ak mobilizasyon pou egzije demisyon prezidan Jovenel Moise nan tèt peyi a.

Nan tèt kole ak divès sendika, Sektè demokratik popilè a anonse grèv jeneral nan tout peyi a pou lendi 26 ak madi 27 novanm k ap vini la a. Mèkredi 28, opozisyon an prevwa manifeste nan tout zòn metwopolitèn Pòtoprens la. Manifestan yo ta dwe rasanble nan divès pwen avan yo monte al fè laviwonn Petyonvil, daprè Rony Timothé youn nan pòt pawòl sektè a.

Timothé Rony di yo pral  » lock » peyi a toujou nan lide pou fòse Jovenel Moise li di ki p ap regle anyen kite pouvwa. Militan politik la mande tout sektè pote kole pou  » libere peyi a anba Tèt Kale « .

Responsab sektè a lonje dwèt sou pouvwa anplas la ki ta angaje mèsenè etranje pou vin tire sou sitwayen k ap revandike yo. Mèt André Michel mande direktè jeneral lapolis la pran responsabilite l.

N ap raple, depi 18 novanm tout aktivite paralize nan kapital la ak divès vil pwovens kote menm lekòl pa fonksyone .