Home Aktyalite Operasyon peyi lòk pou fòse Jovenel Moïse demisyone ap rapouswiv

Operasyon peyi lòk pou fòse Jovenel Moïse demisyone ap rapouswiv

by Kreyòl Enfo

Kreyòl Enfo, 19 jen 2019.- Tansyon an kontinye ap monte nan divès vil peyi a, jodi mèkredi 19 jen an, toujou nan kad mobilizasyon pou egzije demisyon prezidan Jovenel Moïse nan tèt peyi a.

Nan vil Gonayiv, tout aktivite yo toujou rete bloke. Anpil kawoutchou ap boule nan divès katye site lendepandans las. Pwotestatè yo gaye anpil fatra nan vil la malgre Lapolis prezan nan prèske chak kalfou.

Vil Okay, Lapolis itilize anpil gaz lakrimojèn pou anpeche pwotestatè yo ki te kòmanse reyini foule beton an. Pou kontrekare fòs lòd yo, manifestan yo voye anpil wòch epi bloke plizyè ri.

Nan Mibalè (depatman sant), sitiyasyon an pa diferan ak vil nou siyale piwo yo. Manifestan yo te desann nan lari vil la epi gaye wòch ak mete barikad nan divès ri yo te pase.

Nan Pòtoprens, plizyè branch manifestasyon tap pare pou al akeyi delegasyon Òganizasyon Eta ameriken (OEA) kap vizite peyi a apati jounen 19 jen 2019 la. Manifestan yo ki pat rive al devan ayopò entènasyonal Toussaint Louverture an te mache taye banda nan divès ri nan Kapital la.

Kreyòl Enfo

0 comment