Home Aktyalite Okay : 2 prizonye kontamine ak kowonaviris nan gadavi komisarya a

Okay : 2 prizonye kontamine ak kowonaviris nan gadavi komisarya a

by Kreyòl Enfo

Kreyòl Enfo, 22 me 2020.-
Panik nan prizon sivil Okay la (Sid), jodi vandredi a, akoz 2 prizonye kontamine ak nouvo kowonaviris la, daprè enfòmasyon yon polisye pataje ak redaksyon Kreyòl Enfo (KE).

Polisye a k ap travay nan komisarya a menm regrèt rèsponsab yo toujou kite 2 prizonye kontamine a nan gadavi a sou pretèks yo poko te prepare okenn lòt espas pou mete yo. Li di menm moun ki te gen kontak ak prizonye yo nan komisarya a toujou ap regle aktivite yo san yo pa fè tès kovid-19 la.

Toutfwa, polisye a konfime otorite lasante nan depatman Sid la te vin dezenfekte gadavi a. Li fè konnen tou rèsponsab komisarya a deplase 2 lòt prizonye ki te nan espas la. Youn al fèmen nan prizon Kavayon epi lòt la komin Tòbèk.

Plizyè polisye k ap travay nan komisarya Okay la denonse fason otorite nan vil la jere dosye prizonye enfekte yo. Genyen ki menm menase pou pa retounen travay toutotan pa gen bon jan mezi ki pran pou pwoteje yo kont epidemi an.

Kreyòl Enfo

0 comment