Okap : yon veye patriyotik pou prepare manifèstasyon 18 novanm nan

Anpil sitwayen nan dezyèm vil peyi a pap dòmi aswè samdi pou louvri demen dimanch 18 novanm nan.

Apèn bajou kase, yon gwoup moun deja reyini sou plas Katedral Okap la pou patisipe nan yon veye patriyotik. Kolaboratè Kreyòl Enfo nan depatman Nò a konstate gen 4 drapo koulè nwa ak wouj ki plante nan pye estati Jan Jak Desalin nan.

Anpil nan moun k ap patisipe nan veye patriyotik sa gen rad koulè nwa ak wouj tou pandan yon prèt vodou ap òganize yon seremoni pou demare aktivite a.

Nan lokal Delegasyon Nò a ki anfas Katedral la , moun te ka remake plizyè jèn gason ak inifòm militè epi gwo zam nan men yo. Jouk rive 7:00 tè aswè a, okenn ajan lapolis pat prezan nan lantouray plas la.

Manifestasyon jeneral anonse nan tout peyi a demen dimanch 18 novanm nan pou fòse Leta ayisyen fè limyè sou lajan PetwoKaribe a.

@KreyòlEnfo