Home Aktyalite Normil Rameau, nouvo direktè jeneral pou ti bout tan lapolis la enstale nan pòs li

Normil Rameau, nouvo direktè jeneral pou ti bout tan lapolis la enstale nan pòs li

by Kreyòl Enfo

Kreyòl Enfo, 27 dawout 2019.- Premye minis gouvènman demisyonè a, Jean Michel Lapin enstale, jodi 27 dawout la, nouvo direktè jeneral pou ti bout tan lapolis la, Normil Rameau. Yon seremoni ki dewoule nan lokal direksyon jeneral lapolis la nan Petyon vil, an prezans ansyen direktè jeneral enstitisyon an, Michel-Ange Gédéon, dwayen tribinal premye enstans Pòtoprens lan, mèt Bernard Saint-Vil ak divès manm wo kòmandman lapolis la.

Premye minis gouvènman demisyonè a, Jean Michel Lapin te remèsye ansyen direktè jeneral lapolis la pou travay li te fè nan tèt enstitisyon an. Chèf gouvènman an te raple bon kolaborasyon li te toujou genyen ak ansyen direktè jeneral la, pandanl raple defi k ap ret tann nouvo chèf polis la. Pami defi sa yo batay kont gang ki gen gwo zam lagè.

Nan diskou li, nouvo chèf lapolis la te pwofite remèsye Prezidan Repiblik la Jovenel Moïse ki chwazi l pou okipe pòs sa a. Nouvo direktè jeneral pou ti bout tan lapolis la mande polisye yo pou kontinye travay, yon fason pou pwoteje ak sèvi popilasyon an.

Sou bò pa l Michel-Ange Gédéon remèsye otorite yo ak tout polisye enstitisyon an tankou kamarad pwomosyon l, anplwaye fidèl ak trèt ki gen anndan lapolis la. Ansyen direktè jeneral la te raple polisye yo pou travay nan tèt ansanm epi pa fè politik, pandan yap kontinye fè travay yo jan lalwa mande sa.

Nap raple, nan yon arete ki pote dat 27 dawout 2019, Prezidan Repiblik la nome sitwayen Normil Rameau kòm direktè jeneral pou ti bout tan (a.i) lapolis la. Ansyen direktè santral polis jidisyè, Normil Rameau pral gen pou pase devan Sena k ap gen pou deside sou manda 3 lane chèf polis la.

Kreyòl Enfo

0 comment