Nodwès, plizyè pwofesè lekòl tanmen yon grèv grangou

Nan lide pou fòse Leta ayisyen peye anviwon 4 lane san li pa peye yo, plizyè pwofesè nan depatman Nòdwès la tanmen yon gwoup grangou depi 13 novanm pase a. Sa ki bloke tout aktivite nan lokal direksyon depatmantal Edikasyon nasyonal ak fòmasyon pwofesyonèl la.

Pwofesè sa yo k ap viv ak dlo frèt depi nan mitan senmenn nan repwoche Ministè Edikasyon nasyonal ak fòmasyon pwofesyonèl (MENFP, sig nan lang franse) yo di ki pa janm voye je gade yo. Depi lane 2014-2015 lè yo te jwenn lèt nominasyon yo Leta ayisyen pa janm ba yo yon penich alòske yo toujou travay pandan tout ane ki pase yo, daprè pwofesè Josias Duroseau k ap fè kou nan lise Tertulien Guilbeaud Pòdepè.

Mèt Duroseau eksplike  » malgre tout sa yo fè pou montre yo nan nesesite, okenn rèsponsab nan Ministè pa okipe yo. Yo kontante yo sèlman ap fè vye pwomès pou fè nou dodo.  »

Pwofesè k ap fè grèv grangou yo di si minis Josué Agenor Cadet pa satisfè revandikasyon yo, yo ta  » pito mouri » olye yo bay vag.