Kreyòl Enfo, 15 septanm 2020.- Òganizasyon Platfòm Jan Nòdès (Plateforme genre du nord’est, nan lang franse) lanse nan biwo li nan sant vil Wanament, lendi 14 septanm nan, dezyèm faz kanpay sansibilizasyon kont epidemi Kovid-19 la ak vyolans baze sou « jan (genre) » nan 13 komin depatman an.
Kanpay sa k ap bout 9 oktòb k ap vini la a pral dewoule anba tèm : « Kowona pa fini, mete men poun metel atè plat ». Seremoni pou lanse dezyèm faz kanpay sa te dewoule devan reprezantan plizyè enstitisyon piblik ak aktè nan sosyete sivil la.
« Nou lanse dezyèm faz kanpay sansibilizasyon Platfòm lan nan objèktif pou diminye
kowona ak vyolans kap fèt sou fanm ak ti fi. Nou konstate fanm yo pa janm sispann sibi zak vyolans pandan kowona a toujou la, gen moun kap viv nan inyorans ki kontinye ap pran maladi a », eksplikasyon kowòdonatris Platfòm Jan Nòdès la, Jésula Blanc.
Militant la raple Platfòm lan te deja òganize, soti 25 me pou rive 5 jen pase a, yon premye kanpay sansibilizasyon ki te touche tout 13 komin depatman an. Jesula Blanc presize pandan kanpay sa ap gen « mesaj pou sansibilize sitwayen yo, distribisyon afich ki gen enfòmasyon sou kòman pou moun yo aji, elatriye »
Oxfam ak OIM se prensipal òganizasyon etranje ki bay bourad lajan ak teknik pou
pèmèt aktivite yo fèt epi Ministè sante piblik ak popilasyon bay Platfòm lan otorizasyon pou fè aktivite yo nan tout depatman an san pwoblèm.
Dapre dènye avi nimewo 161 Ministè sante piblik ak popilasyon mete deyò sou kantite moun ki gen kowonaviris nan peyi a, Nòdès se 6 zyèm depatman ki gen plis moun ki gen kowona viris ak yon total 253 ka pozitif pami yo 6 deja mouri.
Kreyòl Enfo