NBA : Harden ak Antetokoumpo domine dènye pati sezon regilye a

Kreyòl Enfo, 13 avril 2019 .- Espesyalis nan baskètbòl ameriken yo rekonpanse jwè ak antrenè ki te briye nan NBA a pandan mwa mas ak premye mwatye avril la. Giannis Antetokoumpo ak James Harden k ap batay pou tit MVP a domine dènye pati sezon an.

Zetwal Antetokoumpo

Trèz (13) viktwa, uit (8) defèt se bilan Milwaukee Bucks soti premye mas pou rive 10 avril 2019 la . Bucks yo reyisi bon pèfòmans sa gras ak Giannis Antetokoumpo ki fini meyè jwè konferans lès la pou mwa pase a. Pandan peryòd sa, Antetokoumpo woule ak yon mwayèn 30 pwen, 5.8 pas epi 12.2 rebon nan chak match.

Antetokounmpo ranpòte katryèm meyè jwè mwa li nan sezon an sou senk (5) NBA a distenge nan konferans lès la.

Fenomèn Harden

Nan konferans lwès la, se James Harden ki fè lalwa pandan mwa pase a. Gras ak yon mwayèn 34.8 pwen , 6.9 rebon ak 7.1 pas nan chak match, Harden pèmet Houston Rockets fè sèz (16) viktwa sou ven (20) match li jwe pandan peryòd sa.

Pou jwè k ap fè premye sezon yo nan lig la (Rookie)

Nan konferans lwès la se Luka Doncic ( Dallas Mavericks) ki ranpòte lamayòl pandan mwa mas/avril la pami jwè k ap jwe premye sezon yo nan NBA a. Tandiske, Trae Young ( Atlanta Hawks) fini « Rookie » mwa mas/ avril nan konferans lès la.

Antrenè yo

Terry Stotts: 15 viktwa pou 6 defèt ( Portland Trail Blazers) fini devan nan konferans lwès la. Steve Clifford 13 viktwa 6 defèt ( Orlando Magic) se te pi bon antrenè konferans lès la pandan mwa mas / avril .

Kreyòl Enfo