Home Aktyalite Nan mitan kriz kowonaviris la, fatra anvayi vil Gonayiv

Nan mitan kriz kowonaviris la, fatra anvayi vil Gonayiv

by Kreyòl Enfo

Kreyòl Enfo, 25 mas 2020 .- Pandan tout moun konsantre sou pandemi nouvo kowonaviris la, fatra ap taye banda nan divès ri nan vil Gonayiv. Kolaboratè Kreyòl Enfo (KE) nan site lendeandans la konstate gen plizyè zòn nan vil kote pil fatra monte disèt wotè epi y ap degaje move lodè.

Yon gwoup chofè taksi moto ki di yo regrèt se konsa vil la sal mande lameri ak lòt enstans ki konsène yo pran rèsponsabilite yo sitou nan yon moman kote kovid-19 reprezante yon malè pandye sou tèt chak grenn sitwayen.

Nan kafou Seprenn, chofè sa yo eksplike  » se la nou travay. Nou panse lameri t ap vin ranmase fatra sa yo deja. Chak jou ki pase, fatra sa ap ogmante san rèsponsab yo pa di anyen. Pafwa, li lakoz menm blokis « .

Youn nan yo rapouswiv pou di  » m tande gen yon maladi ki rele kowonaviris nan peyi a, nou pa vle se fatra sa ki lakoz nou vin kontamine. Nou deja pa menm gen yon bon lopital nan depatman an « .

Yon espesyalis nan domèn lasante presize nouvo kowonaviris la se yon viris espesyal. Se pa fatra ki pwodwi l. Sepandan, espesyalis la presize fatra a ka lakoz sitwayen yo trape lòt maladi.

Malgre plizyè tantativ pou pale ak yon rèsponsab vwari nan meri Gonayiv la, okenn moun pat disponib nan lokal enstitisyon an.

Kreyòl Enfo

0 comment