Kreyòl Enfo, 7 avril 2020 .- Pandan epidemi nouvo kowonaviris la ap fè ravaj nan mond la, otorite amerikèn yo chwazi depòte 68 ayisyen, daprè enfòmasyon minis afè etranjè a Claude Joseph konfime. Konpatriyòt sa yo te nan prizon Etazini akoz yo pa gen papye legal.
Minis afè etranjè ak kilt la bay garanti Leta ayisyen deja pran tout dispozisyon pou mete sitwayen sa yo ankarantèn pandan 14 jou. Ofis Nasyonal Migrasyon (ONM) nan tèt kole ak Ministè sante piblik ak popilasyon prepare yon espas pou akeyi konpatriyòt sa yo.
Claude Joseph fè kwè Leta 2 peyi yo te mete yo dakò pou depòtasyon an. Minis la presize gouvènman an ap travay tou pou rapatriye tout sitwayen ayisyen ki vle retounen nan peyi a.
Dimanch pase a, Turks and Caicos te depòte anviwon 200 ayisyen. Plizyè nan konpatriyòt sa yo ki te ankarantèn nan vil Okap deja ap flannen nan tout lari.
Kreyòl Enfo