Kreyòl Enfo, 26 jen 2020 .- Plis pase 17 336 ayisyen kouri kite Repiblik Dominikèn pou rantre Ayiti pandan 15 jou ki sot pase yo, daprè Òganizasyon Entènasyonal pou Migrasyon (OIM, sig nan lang franse). Tout konpatriyòt sa yo ap kite Sendomeng malgre otorite dominikèn yo kòmanse pran dispozisyon pou louvri ekonomi peyi a.
Depi fwontyè 2 peyi yo fèmen ofisyèlman 16 mas pase a, OIM rive konte 57 669 ayisyen ki t ap viv Sendomeng ki deja retounen Ayiti san otorite dominikèn pa fòse yo. Chèf misyon an, Josué Gastelbondo, di OIM pa poze sitwayen sa yo okenn kesyon sou rezon ki ta pouse yo kite Repiblik Dominikèn. Toutfwa, rèsponsab la kwè se difikilte pou travay epidemi Kowonaviris la pwovoke ki lakoz Ayisyen yo retounen.
Majorite nan ayisyen ki kite Sendomeng yo t ap travay nan sektè konstriksyon ki prèske pa fonksyone depi epidemi Kovid-19 la. Gen anpil nan yo tou ki t ap travay nan sektè touristik ak komès. Gen ayisyen ki kouri kite Sendomeng paske yo pa jwenn lajan pou kay.
Pandan konpatriyòt ki t ap viv Repiblik Dominikèn ap kouri retounen Ayiti, sèlman pandan semèn ki sot pase a 6 356 lòt ayisyen travèse fwontyè pou rantre Sendomeng.
Chif Òganizasyon entènasyonal migrasyon yo konsène sèlman 4 pwen ofisyèl nan fwontyè Ayiti pataje ak Sendomeng ak 46 lòt kote sitwayen yo pase. Sepandan, gen plis pase 100 kote nan fwontyè 2 peyi yo moun pase pou rantre oubyen kite Ayiti.
Kreyòl Enfo