Moun mouri, komisarya boule : tansyon nan vil Bomon

Jeremi, madi 27 novanm 2018 .- Gwo van panik soufle, nan aprè midi madi 27 novanm nan, sou komin Bomon, depatman Grandans.

Enfòmasyon ki rive jwenn Kreyòl Enfo konfime deblozay la pete aprè yon polisye ta touye anba bal yon chofè taksi ki rele Camecio Simon.

Popilasyon an ki revòlte aprè zak sa mete dife nan komisarya vil la epi tire anpil kout wòch sou ajan fòs lòd yo.

Majistra prensipal vil la, Faveur Alexis ki t ap pale nan mikwo radyo Mega di yo sispèk gen endividi ki ta vole kèk zam aprè yo te fin mete dife nan komisarya a.

Nan moman n ap ekri tèks la (7:50) , sitiyasyon an toujou chofe nan vil Bomon.