Home Jistis Minis jistis la egzije arèstasyon chèf gang Jimmy Chérizier alyas « Barbecue»

Minis jistis la egzije arèstasyon chèf gang Jimmy Chérizier alyas « Barbecue»

by Kreyòl Enfo

Kreyòl Enfo, 10 jen 2020 .- Minis jistis ak sekirite piblik la, Mèt Lucmane Delile, di li pase ajan Direksyon Santral Polis Jidisyè yo (DCPJ) lòd pou arete chèf gang ki rele Jimmy Chérizier moun plis konnen sou non «Barbecue». Ansyen polisye a k ap k ap taye banda nan komin Dèlma ta mele nan plizyè masak ki fèt sou abitan katye Lasslin, Bèlè ak Site Solèy.

Malgre lajistis te deja mete manda kont «Barbecue», sa pa anpeche prezime asasen an nan tèt kole ak plizyè polisye t ap distribiye manje bay moun Dèlma 2 avril pase a. Imaj distrisyon manje ki te fè laviwonn rezo sosyal yo te choke anpil moun.

Pandan yon konferans pou laprès maten madi a (10), Mèt Lucmane pwofite anonse lapolis pral tanmen plizyè operasyon nan kapital la ak vil pwovens yo pou fouke bandi ki pa sispann mete dlo nan je popilasyon an.

Plizyè militan dwa moun wè nan deklarasyon minis jistis la pawòl gwo van ti lapli. Sitwayen sa yo pran pou egzanp, gwo anons Lucmane Delile te fè 24 avril pase a kote li te bay abitan Vilaj Dedye delè 3 jou pou kite katye a avan otorite yo mache pran bandi yo. Jouk kounye a, lapolis poko mennen okenn operasyon nan zòn sa ki toujou anba kontwòl bandi yo.

Kreyòl Enfo

0 comment