Home Aktyalite Militè dominiken touye 2 Ayisyen nan fwontyè Beladè ak Elyas Piñas

Militè dominiken touye 2 Ayisyen nan fwontyè Beladè ak Elyas Piñas

by Kreyòl Enfo

Kreyòl Enfo, 15 mas 2019 .- Gwo tansyon nan komin Beladè ( depatman Sant), aprè midi vandredi 15 mas la, kote sòlda dominiken touye 2 sitwayen ayisyen epi blese plizyè lòt anba bal akoz yon chire pit pou tè.

Daprè enfòmasyon ki rive jwenn Kreyòl Enfo, yon ekip militè dominiken debake nan lokalite Karisal, komin Beladè, nan lide pou pran yon bout tè sou tèritwa ayisyen an pou konstwi yon kazèn.

Sòlda dominiken yo ki te debake ak elikoptè, cha degè, dwòn (ti avyon) ta pral tonbe nan afwontman ak yon gwoup sitwayen ayisyen ki pat vle kite dominiken yo pran moso tè a, daprè yon rèsponsab nan Gwoup k ap apiye rapatriye ak refijye yo (Garr).

Ajan Inite depatmantal pou mete lòd (UDMO, sig nan lang franse) ki prezan nan depatman sant la pat ka fè anyen devan sitiyasyon an. Otorite nan komin nan mande Leta santral la fè tout sa ki posib pou retabli lapè fwontyè pou evite gen plis viktim.

18 dawout 2018, militè dominiken te deja touye anba bal plizyè konpatriyòt ayisyen nan komin Beladè.

Kreyòl Enfo

0 comment