Kreyòl Enfo, 17 jiyè 2020.- Nouvo Direktè Jeneral Elektrisite Ayiti a ( EDH, sig nan lang franse), Michel Présumé, demanti tout enfòmasyon ki fè kwè li ta mele nan gaspiyaj lajan pwogram PetwoKaribe a. Mouche Présumé kritike rèsponsab Fondasyon Je Klere yo (FJKL) ki raple non li site plizyè fwa nan rapò lakou dèkont sou dosye PetwoKaribe a.
Depi aprè nominasyon Michel Présumé, anplwaye EDH nan divès rejyon peyi a pa sispann pwostete. Yo pè pou nouvo dirèktè a pa revoke yo nan kad mannèv pou privatize enstitisyon an jan yo di li te fè nan Teleco ki kounye a tounen Natcom.
Nan yon bat bouch ak yon kolaboratè Kreyòl Enfo (KE), Michel Présumé pa ekate posibilite pou l demisyone nan tèt EDH si li pa rive jwenn yon antant ak anplwaye yo. Li siyale se popilasyon an k ap soufri si konpayi piblik elektrisite a pa fonksyone nòmalman.
Minis travay piblik yo, Nader Joiseus, denonse sendika anplwaye Elektrisite Ayiti yo ki refize pran chimen dyalòg. Li di se pa posib pou sendika a vle enpoze yon direktè jeneral nan tèt konpayi a. Nader Joiseus kwè gen yon men politik ki kache dèyè mouvman kontestasyon anplwaye yo.
Kreyòl Enfo