Mibalè, yon papa touye pitit li pou zafè tè

Mibalè, 21 desanm 2018 .- Jedi 20 desanm pase a, lapolis fouke Sénat Derilus nan zòn Bayas, yon lokalite nan komin Mibalè, depatman Sant. Mouche Dérilus ta touye, nan lanwit 11 pou louvri 12 desanm pase a, pitit gason li Pascal Dérilus, aprè yon eskonbrit pou yon moso tè.

Enfòmasyon Kreyòl Enfo jwenn fè kwè eskonbrit la pete aprè Pascal, 22 lane, te fin achte yon moso tè nan men papa l pou 35 mil goud. Jèn gason an ki te gentan bay 25 mil goud ta di papa a remèt li lajan an li pap achte ankò. Move kou kong, Sénat Derilus deside touye pitit gason an pandan l ap dòmi.

Mouche Dérilus pa kache se li menm ki komèt krim nan pandan ajan fòs lòd yo t ap arete l. Papa kriminèl eksplike li jete kadav pitit la nan yon latrin ki tou kole ak kay kote fanmi an rete a.

Otorite jwenn yon zam kreyòl anndan kay kote dram nan pase a.

Kreyòl Enfo