Pòtoprens, premye fevriye 2019 .- Chèf Leta a, Jovenel Moise enstale, jodi vandredi a (1), Mèt Réné Sylvestre kòm nouvo prezidan Lakou kasasyon pou ranplase Mèt Jules Cantave.
Mèt Jean-Claude Théogène, vis prezidan, Jean Joseph Lebrun, Ivickel Dabrésil, Barthélémy Antenor ak Sténio Bellevue se senk (5) lòt jij prezidan Jovenel Moise enstale nan Lakou kasasyon.
Chèf Leta a ki te pran lapawòl nan lokazyon an raple enpòtans pouvwa jidisyè a genyen nan peyi a. Jovenel Moise mande nouvo prezidan Lakou a ansanm konpayèl li yo pou leve drapo lajistis byen wo.
Prezidan tou nèf Lakou kasasyon an, Mèt Réné Sylvestre, pwomèt li pral travay ansanm lòt manm enstitisyon an pou avansman lajistis.
Plizyè òganizasyon salye enstalasyon 6 nouvo jij yo ki pral pèmèt Lakou kasasyon fonksyone ak 12 manm jan konstitisyon an egzije sa.
Kreyòl Enfo