Pòtoprens, madi 11 desanm 2018.- Meri Pòtoprens pran devan nan kad planifikasyon pou òganize kanaval nasyonal k ap dewoule 3, 4 ak 5 mas 2019 k ap vini la a.
Nan yon kominike ki parèt madi 11 desanm nan, Administrasyon kominal Youri Chevry ap dirije a chwazi《 RESPEKTE LAVI》kòm tèm kanaval 2019 la.
Responsab Lameri yo raple kanaval se yon gwo fèt kiltirèl ki pote lajwa nan kè moun, konsa nou kapab pwofite moman sa tou pou n reflechi epi diskite sou valè nou tout pataje. Administrasyon kominal la kwè lanmou pou lavi se pi gwo valè moun pataje.
Responsab lameri yo anonse òganizasyon 2 konkou nan lide pou pèmèt atis ak gwoup mizikal yo respekte tèm lan.
Youn nan konkou yo ap chita sou tèm kanaval la ki vize bay gwoup mizikal oubyen atis ki byen trete l la yon cha pou l jwe pandan 3 jou yo.
Lòt konkou a ap reyalize sou logo kanaval la yon fason pou pèmèt lide popilasyon an pase nan dewoulman pi gwo fèt kiltirèl peyi a. Ekip k ap jere òganizasyon kanaval la ap soti kondisyon pou gwoup ak atis kapab patisipe nan konkou sa nan jou k ap vini yo.
‘’Lavi se yon dwa!
Respekte lavi se yon devwa!
Kanaval, se pi bèl moman pou n selebre lavi!’ ‘, se ak mo sa yo Meri Pòtoprens mete bout nan kominike a.
Kreyòl Enfo