Marco Rubio diskite ak prezidan 2 branch palman an sou « fòmasyon yon nouvo gouvènman »

Kreyòl Enfo, 20 mas 2019 .- Aprè prezidan Jovenel Moise, Senatè ameriken Marco Rubio rankontre tou pandan vizit ofisyèl li Ayiti jodi mèkredi a ak prezidan 2 branch nan palman an. Anbasadè ameriken nan peyi a, Michele J. Sison, te patisipe tou nan chita pale senatè Marco Rubio fè ansanm ak 2 palmantè ayisyen yo.

Senatè Marco Rubio presize  » fòmasyon yon nouvo gouvènman, nesesite dyalòg ak bon eleksyon  » te nan mitan diskisyon ofisyèl ameriken yo te genyen ak prezidan chanm depite a, Gary Bodeau, ansanm ak prezidan Sena a, Carl Murat Cantave.

Pandansetan, seyans premye minis Jean Henry Céant ki te pwograme jodi mèkredi a pa rive fèt akoz pwoblèm kowòm. Bò twazè (3:00) aprè midi a, kolaboratè Kreyòl Enfo te konstate 14 senatè nan lokal palman an.

Jean Henry Céant ki di li toujou premye minis depoze yon plent nan Lakou Dèkont kont chanm depite a.

Kreyòl Enfo