Home Aktyalite Manifestasyon machann Petyonvil : « pito kowonaviris touye nou, grangou pa touye nou »

Manifestasyon machann Petyonvil : « pito kowonaviris touye nou, grangou pa touye nou »

by Kreyòl Enfo

Kreyòl Enfo, 23 avril 2020 .- Pandan epidemi kovid-19 la kòmanse ap vale teren nan peyi a, plizyè dizèn machann manifeste nan lari Petyonvil jodi jedi a (23) pou fòse lameri retire arete kominal ki anpeche al vann nan mache chak jou.

Sou malè ki pandye sou tèt chak grenn sitwayen akoz nouvo kowonaviris la, pwotestatè yo t ap chante « pito kowona [kovid-19] touye nou, olye se grangou ki touye nou». Machanm yo repwoche lameri Petyonvil yo di ki « fèmen mache a epi kite tout gwo biznis ap fonksyone nan komin nan».

Nan yon arete kominal ki te pibliye nan kòmansman mwa avril la, Majistra Dominique Saint Roc pase lòd pou mache a louvri pandan sèlman 3 jou sa nan yon semèn. Yon desizyon majistra a di li pran pou anpeche pandemi kovid-19 la gaye nan komin nan.

Anpil moun repwoche lameri Petyonvil yo di ki pran desizyon pou redwi nan fonksyfònman mache san okenn mezi asistans pou akonpaye machann yo.

Daprè bilan Ministè Sante Piblik ak Popilasyon pibliye ayè mèkredi a, Petyonvil se komin ki gen plis moun kontamine ak nouvo kowonaviris la (12) aprè Dèlma (14).

Kreyòl Enfo

0 comment