Kreyòl Enfo, 7 jen 2020 .- Gwo tansyon nan lari Pòtoprens ak Dèlma, maten dimanch la, pandan manifestasyon gwoup polisye «Fantom 509» yo k ap egzije liberasyon kòlèg yo Alexandre Jean Pascal ak pi bon kondisyon pou yo travay. Pou pi piti 3 jounalis blese pandan polisye ki nan machin blede ap tire gaz lakrimojèn pou gaye pwotestatè yo ki t ap rasanble nan kafou ayewopò.
Jounalis Jessica Jourdaint k ap travay pou medya nimerik La Brève Info blese nan jenou ak yon bonbòn gaz lakrimojèn . Jessica Jourdaint ap pran laswenyay nan yon lopital kapital la. De (2) lòt jounalis blese tou aprè yo te fin tonbe pandan polisye ki nan machin blede yo t ap simaye gaz lakrimojèn.
Ajan fòs lòd yo ap fè anpil mannèv pou anpeche manm «Fantom 509» yo ansanm ak militan ki akonpaye yo manifeste nan lari jodi a. Polisye yo tire gaz lakrimojèn sou tout gwoup yo sispèk k ap rasanble nan lari a.
Nan moman an (12:00), anpil katouch ap tire nan zòn kafou ayewopò, Channmas, San fil ak Lali. Gen kawoutchou k ap boule nan divès kafou nan komin Dèlma ak Pòtoprens. Anpil sitwayen ki te nan lari ap kouri pou rantre lakay yo.
Deblozay sa eklate nan kapital la nan mitan epidemi Kovid-19 la . N ap raple zòn metwopolitèn Pòtoprens deja genyen plis pase 2 500 moun kontamine, daprè otorite lasante yo.
Kreyòl Enfo