Rèsponsab Lapolis yo sanble pran tout dispozisyon pou pèmèt jounen mibilizasyon jeneral kont kòripsyon 18 novanm k ap vini la a pase san deblozay.
Pou sèlman zòn metwopolitèn Pòtoprens la 3 000 polisye ki soti nan divès inite espesyalize ap mobilize, daprè pòt vwa enstitisyon an Michel-Ange Louis-Jeune. Gen gwo ranfò ki pral akonpaye polisye ki nan depatman Nò a tou kote aktivite pou make 215è anivèsè batay Vètyè a, toujou daprè kòmandan Louis-Jeune.
N ap siyale, gen anpil menas k ap fèt sou rezo sosyal yo komkwa pral gen deblozay pandan jounen manifestasyon 18 novanm pou mande kot kòb PetwoKaribe a. Sa ki lage gwo laperèz nan mitan popilasyon an .