Majistra Pòtoprens la mande chèf gang Arnel yon ti chans pou match Ayiti-Kiba a

Kreyòl Enfo, 12 mas 2019 .- Premye sitwayen Pòtoprens la, Ralph Youri Chévry, mande chèf gang Vilaj Dedye a, Arnel, sispann tire soti 17 pou rive 25 mas pou pèmèt match Ayiti kont Kiba a jwe nan estad Sylvio Cator.

Ensekirite k ap vale teren nan kapital la sitou kote gwoup gang ak twoke kòn yo bay otorite yo kè sote pou Konkakaf pa elimine seleksyon nasyonal la si Ayiti pa ka asire sekirite kiben yo.

Pandan yon konferans pou laprès, Majistra Youri Chévry di《banm pwofite pale ak Arnel menm si m pa janm rankontre l. Dimanch 24 mas nan estad Sylvio Cator, seleksyon nasyonal la pral jwe kont Kiba. Nou bezwen yon poz soti 17 pou bout 25 mas.》

Prezidan Federasyon Foutbòl Ayisyen an mande kolaborasyon tout sektè nan peyi a pou fasilite match la dewoule san tèt kase.

Match Ayiti-Kiba konte pou katriyèm jounen Lig nasyon Konkakaf yo.

Kreyòl Enfo