Lidè G9 la, Jimmy Cherizier alyas « Barbecue », blese anba bal nan Site Solèy

👤 Kreyòl Enfo

Jimmy Cherizier alyas Barbecue

Kreyòl Enfo, 13 me 2021.- Jimmy Cherizier moun plis konnen sou non « Barbecue » k ap dirije federasyon gang yo « G9 en famille et alliés » blese anba bal, mekrèdi 12 me a, pandan bandi n ap twoke kòn yo nan Site Solèy. Yon notab nan site a ki konfime enfòmasyon an pou redaksyon Kreyòl Enfo (KE) presize ansyen polisye a resevwa katouch la anba tete gòch li.

Yon gwoup medsen te deplase pou al bay chèf gang la laswenyay, daprè Radio Métronome ki presize pa gen okenn ris pou lavi Barbecue.

Jimmy Cherizier viktim pandan li t al pote konkou bay Isca ak Mathias, manm G9, k ap dirije gang nan katye Belekou ak Boston.  2 gang sa yo t ap boukante kout zam ak  yon lòt gwoup bandi nan katye Brooklyn ki gen nan tèt li Ti Gabriel. Afwontman sa yo deklanntche akoz Ti Gabriel ak « sòlda » li yo ta anpeche Mathias fè yon gwo kòkennchenn fèt li te prepare pou anivesè l.

»   Ensekirite : Sitiyasyon an mangonmen nan Site Solèy ak Lasalin

Pou piti 40 moun mouri anba bal nan komin Site nan anviwon yon mwa, daprè Direktè Egzekitif Rezo nasyonal k ap defann dwa moun yo , Pierre Esperance. Defansè dwa moun mande otorite ki nan tèt Leta a pran responsabilite yo pou anpeche plis moun viktim.

Kreyòl Enfo

ou ka enterese