Lestè: polisye kraze rak, komisarya fèmen akoz ensekirite

Kreyòl Enfo, 6 avril 2019 .- Polisye k ap travay nan vil Lestè (Latibonit) kite pòs yo epi fèmen tout pòt komisarya a depi anviwon 2 jou, daprè sa kolaboratè Kreyòl Enfo nan depatman Latibonit la konstate.

Ajan fòs lòd yo kouri kite komisarya a depi aprè operasyon rate Lapolis ansanm ak ajan polis ki nan Minijis te mennen kont chèf gang Arnel Joseph nan komin Desalin.

Move kou kong lanmè aprè operasyon sa, Arnel ak « sòlda » li yo ta deja bloke plizyè wout ki mennen nan « baz » li, Pòs Pyewo, epi menase pou atake kèk komisarya nan depatman an si otorite kontinye rapouswiv li.

Arnel, reprezante yon defi pou Lapolis ak Leta ayisyen. Malgre divès operasyon nan Pòtoprens (Vilajdedye) tankou nan pwovens, Lapolis toujou poko kapab mete lapat sou chèf gang lan ki di li se yon revolisyonè.

Kreyòl Enfo