Pòtoprens ak zòn ki nan lantouray li yo leve kanyank kanyank maten lendi 19 novanm 2018 la. Kolaboratè Kreyòl Enfo ki gaye nan kapital la konstate aktivite yo pap fonksyone jan sa abitye fèt kote gen kawoutchou k ap boule nan plizyè zòn.
Kalfou ayewopò, Pòs machan, Pòtay Leyogàn ak lòt estasyon nan kapital la prèske pa gen machin pou pote pasaje. Sitwayen ki bezwen al nan aktivite yo oblije mache plizyè kilomèt oubyen pran taksi moto.
Lekòl pa fonksyone tou nan kapital la. Plizyè etablisman eskolè rete ak pòt yo fèmen.
Nan moman n ap ekri tèks la (8:00), pòt tout gwo magazen fèmen sou Dèlma a. Se menm sitiyasyon an anba lavil Pòtoprens kote mache Kwabosal ak zòn Lasalin prèske pa gen ti machann.
Barikad ak kawoutchou bloke plizyè wout nan kapital la. Dèlma 18, Sanfil ak Nazon gen endividi k ap voye anpil wòch ak boutèy sou machin k ap tante pran lari a.
Plizyè inite nan lapolis la ap pwonmennen nan lari a.
Opozisyon demokratik popilè a ansanm ak divès lòt òganizasyon politik te lanse operasyon » petwo blokaj » ki demare ak 2 jounen grèv pou jodi lendi ak demen madi a.