Lekòl pa fonksyone, wòch ap tire : panik nan depatman Nòdès

Kreyòl Enfo, 11 fevriye 2019 .- Menm jan ak divès rejyon nan peyi a, sitiyasyon an konplike nan vil Wanament, Fòlibète ak plizyè lòt komin nan depatman Nòdès la, jodi lendi 11 fevriye 2019 la.

Kolaboratè Kreyòl Enfo nan depatman an konstate lekòl, labank ak enstitisyon piblik yo pa fonksyone nan vil Wanament akoz kawoutchou k ap boule ansanm ak barikad ki bouche tout wout yo. Anpil katouch ap tire tou nan komin nan.

Sitiyasyon an dejenere nan Wanament sitou aprè lanmò Angelot Pierre ak yon bal nan tèt, nan lanwit samdi pou louvri ayè dimanch la. Pwòch viktim nan akize patizan vis delege awondisman an, Arold Joseph, kòm rèsponsab krim nan.

Sitwayen nan Nòdès ap pwoteste, menm jan ak rès peyi a, kont lamizè ak pouvwa Tèt Kale a.

Kreyòl Enfo