Lavi kòmanse reprann nan kapital la, maten jedi a

Pòtoprens, jedi 22 novanm 2018.- Aprè 4 jounen latwoublay kote tout aktivite te bloke, lavi kòmanse reprann, maten jedi a (22) nan Pòtoprens ak zòn ki nan lantouray yo.

Nan laviwonn kolaboratè Kreyòl Enfo yo fè nan kapital la konstate, bò 8:45 maten, plizyè kamyonèt ak ti bis kòmanse ap transpòte moun nan divès estasyon nan zòn metwopolitèn nan. Gouvènman an mete plizyè gwo bis Diyite nan lari kapital la tou pou fasilite sitwayen yo deplase.

Anpil ti machann mete komès yo deyò epi gen kèk mache piblik ki louvri nan kòmansman jounen an.

Kreyòl Enfo konstate tou gen plizyè gwo biznis tankou makèt, magazen, labank ak estasyon gaz ki louvri pòt yo.

Toutfwa, anpil nan sitwayen ki pran lari a pa kache laperèz yo akoz zam ki pat sispann chante pandan lanwit la.

Sektè demokratik ak popilè a, youn nan platfòm ki te lanse mouvman grèv la, anonse yon manifestasyon nan komin Petyonvil vandredi 23 novanm lan pou kontinye egzije demisyon prezidan Jovenel Moïse.

Kreyòl Enfo