Latibonit, yon atelye refleksyon nan lokazyon jounen entènasyonal kont vyolans sou fanm ak tifi

Gonayiv, madi 27 novanm 2018 . Kòdinasyon depatmantal Ministè kondisyon fanm ak dwa fanm nan Latibonit òganize, dimanch 25 novanm 2018 la, yon atelye refleksyon nan pou make jounen entènasyonal lit kont vyolans kap fèt sou fanm ak tifi yo.

Responsab enstitisyon an, Madam Jeanne Bolivar, eksplike aktivite sa se yon mwayen pou sansibilize popilasyon an sou konsekans negatif zak vyolans yo genyen sou viktim yo.

Reprezantan ministè fanm nan raple chak fwa yon fanm ak yon tifi viktim vyolans, chans pou li reyisi nan sosyete a diminye anpil. Jeanne Bolivar envite tout moun nan kominote a pote kole pou kwape tout fòm vyolans yo.

Nan yon rapò responsab biwo rejyonal Ministè kondisyon fanm ak dwa fanm nan, Jeanne Bolivar, fè konnen komin Gonayiv se zòn plis vyolans fèt sou fanm. Kòdonatris la di vyolans konjigal ak ekonomik se de (2) prensipal ka, biwo a anrejistre.