Latibonit : Peyizan pran lari kont Leta ayisyen k ap « achte diri pèpè pou kraze pwodiksyon nasyonal la »

Kreyòl Enfo, 28 fevriye 2019 .- Anba lobedyans òganizasyon KOZEPEP, plizyèn santèn peyizan manifeste, ayè mèkredi a, nan lari komin Lestè. Objèktif mouvman sa se pou denonse konpòtman otorite nan Leta a k ap plede fè diri etranje rantre nan peyi a.

Pwotestatè yo ki t ap lanse vye pawòl kont dirijan yo eksplike  » politik achte diri pèpè a ap fin kraze ti rès pwodiksyon diri ki rete nan peyi a ».

Peyizan yo te pwofite manifestasyon sa pou atire atansyon otorite yo tou sou sitiyasyon vale Latibonit la kote lapli pa tonbe depi plizyè mwa epi pa gen irigasyon. Sa ki lakoz tout plantasyon prèske fin pèdi akoz pwoblèm dlo.

Kreyòl Enfo