Home Aktyalite Latibonit : malgre kowonaviris, moun Jan Deni danse rara

Latibonit : malgre kowonaviris, moun Jan Deni danse rara

by Kreyòl Enfo

Kreyòl Enfo, 30 mas 2020 .- Pandan wikenn nan, yon foul moun nan lokalite Jan Deni, depatman Latibonit, patisipe nan aktivite danse rara, malgre otorite yo entèndi rasanbleman ki gen plis pase 10 moun akoz pandemi nouvo kowonaviris la.

Kèk nan sitwayen sa ki pale ak kolaboratè Kreyòl Enfo (KE) nan depatman Latibonit la pa kwè viris kovid-19 la gentan kontamine plizyè moun nan peyi a. Yo di se « lajan otorite yo bezwen fè sou do malere » ki fè y ap di maladi a deja enfekte moun nan plizyè depatman.

Yon lòt gwoup sitwayen toujou nan lokalite Jan Deni eksplike se nan radyo yo tande pale sou pandemi nouvo kowonaviris la pwovoke a. Yo panse « se gwo peyi k ap twoke kòn yo pou kontwole mond la », epi « Bondye pap kite maladi sa pran Ayisyen, dayè yo di li pè solèy ».

Otorite lasante yo konfime 15 moun deja kontamine ak viris la nan peyi a pami yo youn nan depatman Latibonit.

Kovid-19 riske fè anpil dega Ayiti si otorite yo ansanm ak lòt estrikti nan sosyete a pa jwenn yon mwayen pou sansibilize popilasyon an. Pandemi a gentan touye prèske 40 mil moun sou latè.

Kreyòl Enfo

0 comment