Kreyòl Enfo, 29 jiyè 2020.- Odma Louissaint, chèf gang k ap taye banda nan lokalite Savyen an (Latibonit) menase pou l touye jounalis Pradel Alexandre, korespondan Radyo ak televizyon nasyonal (RTNH) nan vil Senmak. Bandi a fè menas sa yo ayè madi a pandan li t ap patisipe nan yon emisyon sou radyo Delta.
Odma Louissaint ki kritike manifestasyon divès òganizasyon nan Vale Latibonit la te òganize 28 jiyè sa pou denonse fenomèn ensekirite a sèmante l ap touye jounalis la. Chèf baz « Gran Grif » la tire pye paske li di Pradel Alexandre asosye li ak zak kidnapig k ap fèt nan rejyon an.
Se pa premye fwa chèf gang ki rele Odma a ak « sòlda » li yo ap menase jounalis. Nan komin Ti Rivyè Latibonit, plizyè jounalis oblije kouri kite vil la pou chape anba bandi k ap menase yo nan kad travay yo.
Pradel Alexandre se Kòdonatè jeneral Federasyon jounalis yo nan Latibonit (FEJA, sig nan lang franse)
Kreyòl Enfo