Home Aktyalite Lapolis rekipere kadav 2 jounalis ki te tonbe anba bal bandi Laboul 12 yo

Lapolis rekipere kadav 2 jounalis ki te tonbe anba bal bandi Laboul 12 yo

by Kreyòl Enfo

Kreyòl Enfo, 7 janvye 2022.- Lapolis akonpaye ak yon jij depè rekipere, jodi vandredi a, nan zòn Laboul 12 (Petyonvil), kadav jounalis John Wesley Amady ak Wilguens Louissaint bandi ak zam te asasine ayè jedi 6 janvye 2022 a. Otorite yo dekouvri kadav viktim yo nan yon min sab Laboul 12 ak plizyè twou bal sou yo.

Premye minis Ariel Henry kondane asasina 2 jounalis yo epi prezante kodoleyans li bay fanmi, zanmi ak tout laprès. Sou Twitè, Ariel Henry di Polis Nasyonal Ayiti a (PNH) dwe fè tout efò ki posib pou frennen fenomèn ensekirite a.

Nan yon nòt pou laprès, Ofis Pwoteksyon Sitwayen (OPC, sig nan lang franse) kondane tou asasina jounalis yo.  Pwotektè sitwayen an, Renan Hedouville, ki raple disparisyon jounalis-fotograf Vladjimir Legagneur mande Leta ayisyen pran responsabilite yo pou pwoteje travayè laprès yo.

Jounalis John Wesley Amady ak Wilguens Louissaint ki t ap travay pou Ecoute FM ak platfòm nimerik Unissons Nous pèdi lavi yo anba bal bandi pandan yo ta pral fè yon repòtaj sou gang Laboul 12 la bandi « Ti Makak » ap dirije.

Kreyòl Enfo

0 comment