Lapolis fouke yon ansyen ajan ak inifòm USGPN

Kreyòl Enfo, 11 fevriye 2019 .- Jean Ednord Innocent, yon ansyen ajan USGPN, jwenn arèstasyon l, jodi lendi, sou Bwa Vèna, nan zòn konpayi telefòn NATCOM. Fo polisye a ki te abiye ak inifòm USGPN te genyen nan valiz li yon zam, 6 telefòn, 3 kouto, plizyè plak machin prive, ofisyèl ak sèvis Leta ansanm ak plizyè lòt inifòm USGPN.

Jean Ednord Innocent te twouve l sou chimen prezidan Jovenel Moise nan moman fòs lòd yo te mete lapat sou li, daprè yon konseye chèf Leta a. Li ta ofri ajan USGPN yo 20 mil dola ameriken pou libere l.

Mouche Innocent ap reponn kesyon Direksyon Santral Lapolis Jidisyè (DCPJ) avan yo transfere dosye a bay lajistis, toujou daprè konseye prezidan Repiblik la.

Lapolis arete ansyen polisye sa nan moman mobilizasyon ap dewoule nan tout peyi pou egzije demisyon prezidan Jovenel Moise.

Kreyòl Enfo